伊莉討論區

標題: 全智賢新劇照copy神劇mode 《藍海》翻炒《星星》《太陽》橋 [打印本頁]

作者: rousseau73 時間: 2016-11-21 12:52 AM 標題: 全智賢新劇照copy神劇mode 《藍海》翻炒《星星》《太陽》橋

由韓國女神全智賢同「長腿Oppa」主演嘅SBS新劇《藍海傳說》上周三首播，大後日就會播出第三集，唔少觀眾睇完頭兩集後，都抱住觀望態度，事關頭兩集《藍海》未算令人有睇到欲罷不能嘅感覺，而且整部劇集有太多《來自星星的你》嘅影子，再加上crossover埋《太陽的後裔》，令到《藍海》嘅新鮮感略嫌不足，網民彈冇新意。不過《藍海》嘅路線都似走緊神劇模式，所以想成為下一齣神劇就要睇下之後劇情有冇突破。

(一)男神女神坐鎮
要做神劇最主要有男神女神坐鎮，《藍海》同《星星》及《太陽》一樣，有女神全智賢及男神李敏鎬做男女主角，為做神劇踏出第一步。
(二)同一編劇角色設定相似
唔知關唔關《星星》編劇同《藍海》編劇都係朴智恩作家，所以喺角色設定上就真係好相似，只係今次《藍海》男女身份就調轉咗，好似喺《星星》中就設定咗金秀賢飾演嘅「都敏俊」係外星人，而全智賢飾演嘅「千頌伊」就係大明星。但係《藍海》中，全智賢就變成美人魚，而呢條美人魚亦都好似都敏俊一樣唔係人類，但同樣有過人之處，雖然全智賢就唔會好似金秀賢一樣擁有超能力，但佢呢條美人魚就擁有強大嘅力量，頭兩集有交代全智賢力大無窮，一腳就踢到身形高大嘅男子幾丈遠，而且佢有驚人嘅學習能力，只利用一個通宵就可以從電腦上學識如何說話及對付壞人。
(三)定情信物
《星星》中全智賢嘅前世同金秀賢有一個定情髮簪，而呢個髮簪亦係關連住雙賢，至於《藍海》中，全智賢同李敏鎬都有一個定情信物，就係翡翠玉鈪，當中美人魚全智賢喺現代再見到李敏鎬時，即喺海底內尋回翡翠玉鈪，李敏鎬亦因為呢對玉鈪而想欺騙全智賢騙取玉鈪，雖然頭兩集未有交代玉鈪來龍去脈，但估計係全智賢所指曾經有一位少年愛上美人魚，而呢個少年就係前世嘅李敏鎬。
(四)情牽幾百年
《星星》中全智賢同金秀賢情牽400年，雖然400年前金秀賢認識嘅係全智賢嘅前世徐宜花，但係《藍海》中，全智賢呢條美人魚就係1589年同身為縣令嘅李敏鎬相識，到咗現代再次與李敏鎬重遇。
(五)男主角勁識撩女
《太陽》中宋仲基嘅撩女功力真係令到唔少女粉絲同喬妹難以招架，同樣《藍海》中李敏鎬嘅撩女手段更有過之而無不及，劇中李敏鎬有過人嘅魅力，甚懂女性嘅心，加上利用催眠術同佢嘅天才騙子功力，令到唔少女性都死喺佢手上，而佢雖然認識全智賢時一手想騙取佢嘅玉鈪，但同全智賢相處後，李敏鎬亦慢慢了解到全智賢嘅純真，而李敏鎬亦對全智賢好鬼細心，見到佢頭髮滿佈樹葉即為佢細心整理，見佢食到變咗污糟貓又即刻為佢抹嘴，所以全智賢好快被佢攻陷，勁冧對方。
(六)靚景定情
《太陽》先後到希臘等地進行拍攝，更到當地一個小島扎金索斯北部嘅Navagio海灘上，即沉船灣。喺沉船灣上宋仲基從向喬妹講浪漫傳說：「如果從海邊撿起石頭，就一定會再次回到這裏，再回到這兒嘅人會把石頭放回原處。」同樣，喺《藍海》中李敏鎬帶全智賢去到西班牙埃庫萊斯燈塔，亦即李敏鎬所指嘅世界盡頭之地，仲話喺呢度分手就可以再次見面，暗示同全智賢將會再次相見。
(七)人工呼吸
《太陽》中宋仲基同喬妹架車跌落山崖，當時宋仲基果斷令二人跌落海成功救出喬妹，但因喬妹暈倒，所以宋仲基就為佢施展人工呼吸。而喺《藍海》中，全智賢同李敏鎬因為逃避追捕去到山崖，最後全智賢捉住唔熟水性嘅李敏鎬跳落海，喺水底中變返人魚嘅全智賢就主動獻吻，為李敏鎬施展人工呼吸。

心得：天下文章一大抄，重點是怎樣抄，如何抄，不在於有沒有抄。

[attach]116641158[/attach][attach]116641163[/attach][attach]116641160[/attach][attach]116641162[/attach][attach]116641165[/attach][attach]116641166[/attach][attach]116641167[/attach][attach]116641169[/attach][attach]116641170[/attach][attach]116641171[/attach][attach]116641172[/attach][attach]116641174[/attach]

歡迎光臨伊莉討論區 (http://www77.eyny.com/)